Augsburg-plaas vorm deel van Augsburg Landbougimnasium. Dit is ‘n kruis kulturele laer- (215 leerders) en hoërskool (330 leerders).
Die skool bedien leerders vanaf Namibië, Namakwaland, Weskus, Swartland, Namakwaland en Sentrale Karoo.
‘n Groot area van Suidelike Afrika word dus deur die skool bedien. Normale akademiese- en landbouvakke word hier aangebied.
Die plaas word dan ook as ‘n basis gebruik om vir die landbouleerders praktiese landbou ervaring te gee.
Augsburg-boerdery beskik oor boerderyvertakkings wat sover as moontlik ons streek se produksierigtings verteenwoordig. Die doel hiervan is om die toekoms van landbou veral in ons streek te bevorder en sodoende by te dra tot voedselsekuriteit en te belê in die jong landbouers se toekoms.
Augsburg-boerdery bestaan uit Augsburg Plaas, Warmhoek en Taaiboskraal. Die onderstaande produksierigtings word hier aangebied.
Wat ‘n voorreg is dit nie om op ‘n plaas groot te word nie.
Pinotage
Chardonnay
Dorperstoet
Merino skape
Washington
Bahianinha
Midnight
Eureka
Nadorcott
Uiesaad
Broccoli
Boerbokstoet
Angora bokke
Melkbokke
Aangeplante weidings
Natuurlike weidings
By Augsburg poog ons om leerders bloot te stel aan die nuutste boerdery-praktyke, tegnologie en infrastruktuur in die bedryf. Ons is dankbaar vir die ondersteuning van die WKOD wat ons visie deel.
Augsburg-boerdery met sy wye verskeidenheid produksierigtings en infrastruktuur maak dit moontlik om uitstekende praktiese opleiding te verskaf. Tesame met ons leerkragte, landboukundiges vanuit die privaatsektor, en uitstappies na plaaslike landboukundige bedrywighede, word landbouers by Augsburg opgelei met maksimum blootstelling.
Praktiese-opleiding gebeur Dinsdae en Donderdae namiddae in al drie landbouvakke naamlik: Landbouwetenskappe, Landboubestuurspraktyke en Landboutegnologie. Augsburg is ook die enigste landbou-fokusskool in die Wes-Kaap waar dogters, sowel as seuns, landbouvakke kan neem.
By Augsburg belê ons in die toekoms van jong landbouers. Ons besef werksgeleenthede na skool skaars is, daarom bied ons tien geakkrediteerde landboukursusse aan waar leerders hulself kan bemagtig met addisionele kwalifikasies.
Hierdie kwalifikasies gee ons leerders ‘n voordeel bo diegene wat aan die einde van hul skoolloopbaan slegs ‘n matrieksertifikaat het om werk te kry in die landboubedryf.
Augsburg is ‘n trotse Jeugskou-skool. Jeugskou word as ‘n skoolsport beoefen en ons spog met meer as 150 deelnemers.
Deelnemers kry die geleentheid om by ongeveer 8 streeksskoue met hulle diere te gaan skou. Deelnemers skou met melkbokke, boerbokke, angorabokke, vleisskape, wolskape, perde, konyne, hoenders en beeste. Daar is ook ‘n kulinêre kuns en suiwelbereiding afdeling.
Tydens die streeksskoue kwalifiseer deelnemers om aan die WP-kampioenskappe te gaan deelneem en daar word die eerste drie deelnemers gekies om WP by die SA-kampioenskappe te gaan verteenwoordig. Augsburg is een van die topskole wat ongeveer die helfte van die WP-span beslaan.
